De Fleech
(Variation auf gleichnamiges Krätzjen vom Colonia Duett)
Mir zwei wollte drinke - un do kohm de Fleech
Dä jrößte Schwaadlappe - bei uns an de Thek
Ohne ze jröße fung hä direk ahn
Ne Wörter Zsunami - ne Jroscheroman
Hä philosopheeten övver Jott un de Welt
Un sing Hämmoride - un bestellt en Frikadell
Mit vollem Munde schwaad hä singe Stuss
Mir zwei stundten unger Hackfleischbröckchenbeschuss
Mir zwei wollte drinke - dat Kölsch dat wor hin
Dä Schuhm dä wor fott - et Hackfleisch wor drin
Mir dauten et fott - do säät hä: Ihr Köpp
Dat nemmen ich met dat kritt minge Möpp
Nohm vierte Kabänes - de Fleech kohm op Tour
Hä fung ahn ze singe - him wor noh Kultur
De Tonart wor neu - dr Text irjendwas
Dr Weet längs en dr Küch - dä Kabänes wood blass
Un wor jetz ne Korn - mer drunken ihn schnell
Dä Schwaad wor schon schlimm doch dä Jesang kriminell
Wie ka`mer dä stoppe - mer kohmen nit drop
Do kohm die Erlösung - de Düür die jing op
Eren floch en Wachtel - maat e jrimmich Jeseech
Die Wachtel wor nämlich die Frau vun dä Fleech