Em Hingerhoff

 

En pinke Krohl fläut: Baby you can light my fire

Se hät e piercing em Schnabel en dr Krall en Fläsch Tokajer

Dä Wind hült durch de Bäum: Ihr sidd all bahl dran

Un dä Zoch vun wiggem flüstert: Jecke Wind stell dich nit esu ahn

Do flitsch en Flitsch un die Krohl fällt mondän ävver duut eraff

En et Jebösch op dä Jrill vun dä Lück un die woren baff

Do sooßen Jimi, Trude, Janis, Brian, Schäfers Nas, Amy un Jim

Un John, Rio, Müllers Aap un Kurt Cobain öm dä Jrill eröm

 

Em Hingerhoff bei mir

spuk et ech off ich schwör et dir

Hät wohl die Stadt e Jeisterveedel ahnjelaat

Zwesche dä Bäum läuf dä Director`s Cut vun minge Dräum

Un et lääv wat lääv he bei mir em Hingerhoff

 

Onkel Heinz steht wie immer akkurat jescheitelt op dr Muur

Doch wat es dat do steck doch jlatt e Blöömche övver singem Ohr

rööf: Ruhe do unge ich roof de Schmier weil ich han Angks

Un Schäfers Nas empfiehlt: Höösch Bloot, Jung, jevv peace en Schangks

Un jitt Onkel Heinz ne Schenkel vun dä pinke Krohl

Doch do es Tanti Otti dozwesche: Vielen Dank e ander Mol

Em Jebösch weed jebösch un Trude frööt dä Kurt:

Saach meinsde nit och dat unsere Keith su langsam ens kumme mööt ?

 

Em Hingerhoff bei mir

spuk et ech off ich schwör et dir

Hät wohl die Stadt e Jeisterveedel ahnjelaat

Zwesche dä Bäum läuf dä Director`s Cut vun minge Dräum

Un et lääv wat lääv he bei mir em Hingerhoff

 

Op däm Flachdach jäjenövver weed seriös jekiff

Un Roy Black beroyt: `sch ha`misch met zu vill fuule Leeder verjeff

Un Rio nemp Roy en dä Ärm un säät: Der Traum is aus !

Plötzlich räänt et schwatz wieß Konfetti un et klingk wie Applaus

Dodrop schweb die pinke Krohl op eimol övver däm Jrill

Un fladdert met einem Flüjel un alles es still

Se krieht: Ihr wollt mich he jrille wie e Vieh ?

Saach erkennt ihr mich dann nit en minger Joggingkläddaasch ?

Ich ben Freddie Mercury

 

Em Hingerhoff bei mir

Jiddet och Zoff ich schwör et dir

Hät wohl die Stadt ne soziale Brennpunk ahnjelaat

He em Jebüsch flüsch alles wat niemols su janz jonn kann

Un et lääv wat lääv he bei mir em Hingerhoff