Rääch ze wisse

 

So. Da wolle mer doch ens kucke, wat hück widder määt...

Zehus es nit, et Leech es us, un normal määt dä öm die Zick et Leech noch nit us.

Ävver vielleich es jo och krank un es fröher nohm Bett jejange. Dat weiß mer bei däm jo nie.... Wat maach dä maache ?

Dä hät öm de Eck ene Stellplatz, ävver dä park miehstens drövven nevven dä Einfahrt, met dr Stoßstang halv en dä Einfahrt drin, dat dä Drevens Pitter do koum eruskütt. Ne, dä hät nämlich och ene Parksching....

Dat darf dä doch janit: Stellplatz un Parksching ! Ne, do fängk et doch schon ens ahn.

Dä jrööß mich nit, wenn usem Huus jeht...dä sprich met keinem op dr Strooß. Dobei wonnt dä schon drei Woche he....

Also su jet Unauffällijes ha`sch noch nie jesinn...

Ich jläuv dä hät noch nit ens ene Hungk....Jungejungenä....

 

Mir han e Rääch ze wisse - wat hät dä für ne Plan

weiß wat dat für eine es - dat jeit uns all jet ahn

 

Dä fährt ene Hyundai. Dat es koreanisch...Achse des Bösen. Wie ka`mer su e Auto fahre....Ävver miehstens fährt jo Fahrrad...Dreijangschaltung, primitiiiiv...

Ävver ich han dat Jeföhl, dä es uns all am blöffe...dä hät nämlich och esu enen...eh, Breitwandhandy, do wo de Fußball met kucke kanns...ävver Fußball interessiert dä doch janit, dä doch nit.....wat maach dä maache ?

Dä es noch kein drei Daach hingernander öm de selve Uhrzick usem Huus jejange...da`s do`nit normal...

Do ! Jetz kütt us dr Weetschaff ! Wat hät dä dann do en dr Hand...? Ne Zahnstocher...Jo, ävver dat es doch e Raucherlokal, die dürfen doch janix ze esse verkoufe ! Jaaa, do muß ich ävver morje direk ens beim Odenungsamp ahnroofe...Jungejungenä...

 

Mir han e Rääch ze wisse - wat hät dä für ne Plan

weiß wat dat für eine es - dat jeht uns all jet ahn

 

Do kütt ald widder met zwei Einkaufstüte vum Netto...Jungejunge, immer nur Netto. Dä es bestemp Hartz 4. Dä ! Dat ha`sch mer doch direkt jedaach...

Wat hät dann en dr Brustäsch ? ......ne Wettsching vum Garbinski, 7. Rennen, Dreierwette.....Dat darf dä doch janit ! Als Hartz 4 ! Wenn dä jetz jewennt, dann kritt dät Jeld jo praktisch von meinen Steuerjroschen ! Jadaleckmichdoch...do muß ich ävver am Mondaach direk ens dä Max ahnroofe, op dä die Dreierwett jetroffe hät.....Dat däät mer noch fähle, daß ich dem seine Spielsucht finanziere....Ich zahle doch schon jenooch für die !!

Och, do kütt dr Breefträjer...ja, da wollemer doch ens kucke, wat ihm hück bringk....jestern wor et jo nur ne Breef vun dr Stadt....wor bestemp e Knöllche, wenn nit mieh...

Ooch, e Paketche kritte hück...ja, wa`s...?! Do sin jo amerikanische Breefmarke drop...tsss, die Amis, die han doch e su e jroß Land, ne....do sollen se uns doch en Rouh loosse ! Nit dat mir onnoch pleite jonn...dä Obama, dä schöne Jespritze do !

Ävver ich däät jo zu jään wisse, wat en däm Päckche dren es. Ävver hät jo de Küch noh hingen erus, un vörren immer de Jadinge vür...och daachsövver...Ja, do kanns de doch dran föhle ! We`sch doch nix verbroche han, da mu`sch doch nit de Jadinge vürmaache.....Jungejungenää....

 

Mir han e Rääch ze wisse - wat hät dä für ne Plan

weiß wat dat für eine es - dat jeit uns all jet ahn