Weihnachtskaat vun nem Flittche vum Eijelstein

(Orig.: Christmas Card from a hooker in Minneapolis, T.&M.: Tom Waits)

 

He Jächt ich bin schwanger

Un ich levve om Eijelstein

Övver nem Türke Büdche

Direck an d`r Wiggejass

Ich bin weg vum Stoff bin weg vum Schabau

Un minge Mann spillt Trompet em Strickstrump

Un arbeit bei d`r Bahn

 

schwört mir liebt mich

Obwohl dä Blaach nit vun ihm es

säät däät sich kümmere

Wie öm sieh eije Kind

joof mir ne Ring dä sing Mamm jedraage hät

Un jede Samsdaach nemp mich mit

En sing Stammdisko om Ring

 

He Jächt ich denk off an dich

Jedesmol wenn ich ene Western sinn

Wäje dinge Klamotte

Die passten immer wie en Fuuss op et Ouch

Ich hann immer noch die Plaat

Vun Frank Zappa un dänne Mothers

Ävver se hann minge Plattenspieler jekläut

He hälst du dat noch us

 

He Jächt ich wör fass usjeflipp

Wie se dä Mario opjeschlitz hann

Ich bin zoröck nohm Niederrhein

Öm bei minge Lück ze sinn

Ävver jede, dä ich domols kannt

Es duut oder en d`r Klapsmüll

Dröm bin ich widder he hin

Ich jläuve dismol bliev ich do

 

He Jächt mir jeht et joot

Zum eezte Mol sick mingem Unfall

Ich wünsch ich hätt all dat Moos

Dat mir zwei verblose hann

Ich hätt en Hääd Autos un keins jööv ich her

Ich führ jeden Daach en andre Kiss

Je nachdem wie ich mich föhlt

 

He Jächt in Joddes Name

Willste wisse wie et wirklich es

Ich hann keine Mann un dä spillt och kein Trompet

Ich bruch dringend Jeld für dä Anwalt kumm Jächt maach

Ich waade op en Meldung am Valentinsdaach