Fümmunzwanzich Johr

Et wor ne Sonndaach

Ne Fröhlings - Sonndaach

Vür jetz joot fümmunzwanzich Johr

En Super Band wor

Op däm Konzert do

Marie un ich kohmen uns noh

Mer han jesunge

Laut metjesunge

Un wie us einer Siel jeföhlt

Noch vür dr Zujab

Drusse om Parkplatz

Hann mir uns schwer de Hoor zerwöhlt

Vun do an wore mir Naturjesetz

Em sibbte Himmel Wolke Aach

Blömche em Hoor durch Wald un Flur jefetz

Ojo jo sin unjelore

Nur noch jeflore

Vür unjefähr nüngdousend Daach

 

Dann Flitterwoche

Keiner moot koche

Brothähnche us dr Luff jeplöck

Fröhstöck met Latte

En Hängematte

Mer woren rammdösich vür Jlöck

Dabei die Schallplaat

Vun unsere Junge

Die nur für uns jeschrivve wor

Wenn mir ze Hus sin

Un die Junge spille

Dann si`mer bröhwärm widder do

Plötzlich hatt sich die Band dann opjelös

Se loren sich wohl en de Hoor

Nit ens ihr Leeder han uns dann jetrös

Nä nä nä dat darf nit wohr sin

Dat die nimmieh do sin

Vür jetz knapp fümmunzwanzich Johr

 

Nohm zweite Panz dann

Do fung dä Punk ahn

Su hatte mir uns nit jekannt

Et wor nur noch frackich

De Nerve nackich

Jeschenke floren an de Wand

Dann han Marie un ich uns opjelös

Noh schlappe fümmunzwanzich Johr

Vorüberjehend hät jet Rum jetrös

Jetz pass op: janz still un heimlich

Dat nennt mer Timing

Wor uns Band op eimol widder do

 

Wat soll ich sare

Se han sich verdrare

Et joov e Konzert wie einst em Mai

Ich däät jubiliere

Fas schon vibriere

Dä Äldste en dr eezte Reih

Zo jedem Leedche

E scharf Annekdötche

Su daach ich dat et kumme muss

Et kohm janz anders

Ich kohm durchenander

Bei jedem Leed kräät ich dä Blues

Ich kunnt nur noch denke an die Schäbigkeit

Wie usselich uns Trennung wor

Un övverhoup - die Band die do bovve spillen deit

Dat sin nur sacklahme Ente

Senile Fänte

Reif für de Rente

Nit wie vür fümmunzwanzich Johr